قالولي الريس هو اللي جايبنا ورا " 8 نوفمبر2010"

• سواق التاكسي بعد ما فضل يحقق معايا 10 دقايق و في الآخر رفض يوصلني
• الموظف بعد ما وقفني في الطابور ساعة و نص ,و ربع ساعة كمان قدامه علشان يفطر و في الآخر مخلصليش الورق علشان ناقص امضاء

الصنايعي بعد ما اداني 20 ميعاد و مجاش في ولا واحد فيهم


بتاع شركة الاتصالات بعد ما أصر أني أدفع الأول و بعدين أقدم شكوى


صاحبي لما أداني ميعاد الساعة 7 و استغرب لما وصل 9 مالقانيش


السباك بعد ما جبته يصلح الموتور اللي صلحه من أسبوعين و أخد الكشف مضاعف علشان هيبص على الحنفية كمان

المستورِد لما بطّل يستورد البضاعة الأصلية من بلدها و بقى يستوردها مضروبة من الصين


السايس بتاع الجراج لما لقيت العربية مخبوطة و حلفلى أن الخبطة دي قديمة و أنا اللي ناسي و في الآخر اكتشفت أنها مش عربيتي أصلا


دكتور الجامعة لما دخلتله في الشفوي و كان معاه ابنه و بنته المتعينين معاه في نفس القسم


دكتور المستشفى اللي بييجي يومين في الأسبوع علشان يزعق في الناس لما سألته عن الهدية اللي بيجيبها للموظف علشان يظبطله الغياب حرام و لا حلال


أمين الشرطة لما كان عايزني أوصله بعربيتي بعد ما لّم الأتاوة من كل البقالين اللي في الشارع


ابن البواب لما قفشته هربان من المدرسة علشان يعاكس البنات هو و أصحابه


جارنا لما سألته ليه بيرمي الزبالة في الشارع.....و كمان من البلكونة


عميد الكلية لما خصص عيادتين من أصل 3 عيادات في قسم واحد للأخوة الليبيين علشان يشتغلوا فيهم و طرد المصرييين


سواق الميكروباص اللي عنده استعداد يدوس عليا علشان يركِّب زبون في نص الشارع


آخر واحد......الندل اللي مبيسألش عليا غير علشان مصلحته ...لما قلتله أني لو كنت ربيت كلب كان هيبقى أوفى منه