شوقيات 3 "نشرت في 1 نوفمبر 2010"

لازم تقتنع أنك مهم جدا.........بالنسبالك

الخلافات الزوجية...هو يجيبلنا شلل أطفال و هى ترعى الحملة القومية للتطعيم ضد شلل الأطفال

فعلا الغش وصل منتهاه.....حتى الصابونة كل ما استخدمها تصغر

القراءة للجميع.....عقبال الأكل و الشرب و التعليم و العلاج و الديمقراطية

أنا مش عندى ربع ضارب.....أنا عندى ربع سليم

أنا مش متواكل...أنا بس مستني قريبي اللى فى البرازيل يموت عشان أورثه و أبدأ مشروعي

بقول لكل اللى محضرش حفلة التخرج...كانت حلوة قوى...متفوتهاش المرة  الجاية

مشربتش من نيلها.....أمال جالك فشل كلوى منين؟؟

محدش بيتعلم ببلاش.....و لا بفلوس

لأ حرف الصصصصصصصصصصصصصصصصصاد مش معلق عندى خالصصصصصصصصصصصصصصصصصص

زمان:اكفل طفل يتيم...و بعد مجهودات مبارك.....اكفل قرية فقيرة

قمة الاحترام:أنا مبكلمش بنات.............ولا ولاد

بعد الطماطم ما رخصت......شكلها متغيرش قوى يعنى عن آخر مرة شفتها

كيف تصنع تلاجة كبيرة:........تجيب شوية برد و تحطهم فى علبة كبيرة

طبعا الرؤية واضحة و أنت سايق الصبح.......ماهو كل العماويد منورة

نفسي أعرف مين اللى سرق أدواتى......عشان أديله البالطو

كيف تصنع تلاجة صغيرة.......تقسم التلاجة الكبيرة اتنين

لا مساس بمحدود الدخل...............سيبوه يموت لوحده زى الكلب

الكورة أجوان............ وملعب و لعيبة و حكام

الوقت سرقنا.......هى جت عليه
ليت الشباب يعود يوما............و ياريت لو يوم جمعة

يادى النيلة.....هو أنا كل ما اشترى شبكّة.......تطلع مخرومة

ياما فى السجن..........مساجين

بلدنا غالية قوى.............بس مش هنختلف فى السعر

منتهى الأيجابية.............بدلا من أن تلعن الظلام..........العن أبو اللى كان السبب فى الظلام

:)))))))))))))))))))))))))))))

الوطن الذى طلبته مرفوع دائما من الخدمةلحل مشكلة السكان تحت خط الفقر...بقترح على الريس يمسح الخط و يرسمه تحت شوية

السيد أحمد نظيف شايف أن الحد الأدنى للأجور لا يجب أن يزيد عن 400 جنيه شهريا.....مصيبة ليكون يقصد أجور كل المصريين على بعض

فتَّح مخك........استخدم كريم أيفا

أنا مستحيل أبيعك يا صاحبي....هو في حد أصلا هيرضى يشتريك

لازم نقضي على البيروقراطية و الروتين....اللي عايز يشترك معايا يجيب صورتين من البطاقة و صورة شخصية مختومة بختم النسر و مينساش شهادة اثبات الجنسية و يكون ماضي عليها اتنين موظفين لا يقل مرتبهم الشهرى عن 400 جنيه

أوعى تيأس و تخبط دماغك فى الحيط.....اشرب من البحر

بلاش تمشي حافي....اجري

شعب غريب.....يرمي فضلاته في النيل ...و يروي الزرع ب مية مجاري

لو لم أكن مصريا....كان الاسعاف لحقني قبل ما أموت

• ليه هنتخب مبارك؟؟ علشان أثبت ان الحياه تبدأ بعد التمانين

للأسف قصة واقعية:... الورق في مصر أهم من البني آدم.....و الفلوس بتشتري الاتنين

:((((((((((((((((((((((((((((((((((((((((((((((((((((((((((((((((((((((((
 ماتحاولش تفهم كل حاجة........... لأنك مش هتلاقي حاجة تعملها باللى انت فهمته
نافق رؤساءك على قد ما تقدر......و متنساش أن الكلمة الطيبة صدقة

أوعى و أنت سايق متجريش ورا عربية الاسعاف........ أحسن الناس تفتكرك أجنبى

خليك مثقف و اتكلم فى اللى يهم الشعب................الكورة و العربيات

فكر دايما فى المستقبل...... هتجيب تمن العشا منين؟

أوعى تنسى و أنت سايق بعد ما تشتم و تعمل غرز و تخبط عربيات الناس أنك ترفع ايدك قال يعنى بتعتذر......أحسن يفكروك قليل الذوق

أوعى ترفض أى رشوة........النبى قِبل الهدية

خليك على طول متفائل........مفيش أسوأ من اللى أحنا فيه

خصص يوم الجمعة من كل أسبوع للأخلاص فى العمل..........و كده كده الجمعة أجازة

حاول دايما توصل متأخر عن ميعادك....... و أهو توصل متأخر أحسن ما متوصلش خالص

اقنع نفسك أنك أحسن من ناس كتير........علشان كده لازم تذلهم و تطلع عينهم

متشيلش هم الفقر و الجوع...... الريس هيفقرك و يجوعك

دايما بُص لنص الكباية المليان............. وساخة